يايمه بنتك عيبها لوتبعد اشويه تحن
قلب صغير ربته دنيا وسمته الحنين
لاتساليني عنها ماجت على ماكنت اظن
دنيا قساوتها حجر صعبه لامثالي تلين
دنيا كريمه لابغت تجرح وبالفرحه تضن
تسرق ملامح ضحكتي وتقول:انا اعجبها حزين !
حتى خفوقي لا انجرح منها محال انه يئن
في شرعها مايشتكي مجروح ولايصرخ طعين
واجد خذت ياميمتي تاخذ وثم ترجع تمن
لو ذقت حاليها سنه تسقيني العلقم سنين
يمه تعبت من الالم ظالم ولا وده يحن
لكن ابصبر وارتجي لي رب رحمن ويعين
بس انتي لاعد تساليني وان شفتي ادموعي تجن
ياما وياما بهالدموع اشياء كثيره ماتبين